Rådmannen understrekar at Samnanger ikkje er særleg sårbar for utflytting på kort sikt. Samstundes meiner han folketalsutviklinga over tid er ei utfordring.
Særleg éi utvikling uroar han.
– Eg er meir bekymra på utviklinga over tid, særleg dersom fleire i dei yngste aldersgruppene flyttar ut. No ser me til dømes ein for stor nedgang i talet på barnehage- og skuleborn.
Han opplyser òg at tala for andre kvartal ikkje får store konsekvensar for kommuneøkonomien.
Vil gjera kommunen meir attraktiv
For å styrkja grunnlaget for folkevekst peikar rådmannen på fleire tiltak.
– Me er opptekne av å tilby gode lokale tenester med trygg finansiering og høg kvalitet.
Han trekkjer òg fram den komande idrettshallen.
– Dette prosjektet kan bidra til at fleire blir buande i kommunen, samstundes som hallen kan vera eit pluss for folk som vurderer å flytta hit.
I tillegg peikar han på bustadutvikling.
– Me jobbar med ein arealplan som skal leggja til rette for nye bustader. Det er viktig dersom ein ønskjer å trekkja til seg fleire innbyggjarar.
Må tenkja langsiktig
Rådmannen meiner det er viktig å sjå folketalsutviklinga i eit langsiktig perspektiv, og åtvarar mot å ta store avgjerder basert på korte svingingar.
– Me må unngå å investera for mykje eller for dyrt i løysingar som kanskje ikkje blir naudsynte i framtida. Utviklinga er vanskeleg å spå heilt sikkert.