Det var klokka 15.10 søndag at politiet fekk inn melding om ulukka i Tyssevegen.
Anders Opsahl i politiet var leiar på skadestaden. Han fortel til Bergens Tidende (BT) at bilen som var involvert i ulukka blei brukt til øvingskøyring.
– To syklistar var på veg ned ein bratt sideveg til venstre for bilen. Samanstøyten skal ha skjedd då syklistane kom ut i vegbana, opplyser han.
Både politi, ambulanse og brannvesen rykte ut. Helsepersonell som hadde fri var tilfeldigvis på staden og hjelpte syklisten fram til ambulansen kom. Syklisten blei frakta til sjukehus.
Politiet avhøyrde vitne og var ferdige på staden klokka 16.56. Dei opprettar sak.