Han er leiar for politiet i Kvam, Samnanger og Tysnes. No har han gått gjennom statistikken for 2024.
Etterforskingssakene som har med økonomisk kriminalitet å gjera, hadde sterkast auke i heile Vest politidistrikt i fjor. I Samnanger handla ti av sakene om økonomi.
– Me oppfattar at det er vaksne som blir svindla mest, frå midten av 40-åra og oppover, opplyser politioverbetjent og straffesaksansvarleg Anne-Siri Tysseland.
Ber folk tenkja seg om
I fjor registrerte politiet 75 etterforskingssaker i Samnanger. Dette er ein auke frå 61 i 2021.
– Me har kome opp att der me var i 2019/2020. Men dette er framleis små tal, meiner
Sperrevik.
Politiet opplyser at det er fleire eldre enn unge som blir svindla for pengar. Dette kan skje på e-post, SMS, telefon, eller i form av kjærleikssvindel. Svindlarane kan òg bruka Facebook-
kontoane til folk du kjenner.
Politistasjonssjefen ber folk tenkja seg nøye om.
– Stopp, tenk og sjekk. Det kan vera for godt til å vera sant. Ikkje ver for godtruande, seier Terje Sperrevik.
– Det er viktig å anmelda når du først opplever svindel, minner Tysseland om.
NY TEKNOLOGI: Politioverbetjent og straffesaksansvarleg, Anne-Siri Tysseland, opplyser at kunstig intelligens blir brukt i kriminalitet på fleire måtar, mellom anna i svindel og seksuallovbrot. FOTO: Siri Ravn
Kan ikkje tru det du høyrer
Politiet gjer merksam på at også kunstig intelligens kan nyttast av kriminelle.
– Du kan høyra ei stemme som høyrest ut som mi eller Anne-Siri si, fortel Sperrevik.
– Fleire blir kontakta av folk som utgjev seg for å vera i politiet. Me spør aldri etter bank-ID og personnummer, opplyser Anne-Siri Tysseland.
Viss nokon ringjer deg, men du blir usikker på om vedkomande er den han oppgjev å vera, har ho eit tips.
– Du kan be om telefonnummeret, og ringja tilbake.
Trafikken aukar
Den absolutt største posten her i kommunen er – som vanleg – trafikksaker. Heile 28 av sakene handla om aktlaus køyring, ulukker og høg fart.
– I Samnanger er det ein god del gjennomgangstrafikk og eit veldig stort behov for trafikk-
kontrollar. UP er med og hjelper oss her, opplyser Sperrevik.
Vanlege forenkla førelegg blir ikkje tekne med i denne statistikken. Om sjåføren held så høg fart at politiet opprettar etterforskingssak, blir ho med i statistikken. Trafikkhendingane skal stort sett ha skjedd på Bjørkheim og Frøland, i tillegg til enkelthendingar mellom Bjørkheim og Ådland.
– Det kan òg vera turistar i leigebilar som skapar trafikksituasjonar når dei ser på den flotte utsikta, fortel Sperrevik.
Kan gje bøter
Tidlegare har Samningen skrive om ulovleg parkering i Gjerdsvegen. Sperrevik minner om at politiet kan gje bøter til feilparkerte bilar.
– Det er ikkje det me skal prioritera. Me har fått spørsmål om å intensivera kontrollane opp Gjerdsvegen. Parkering i vegen der born skal gå til skulen, må skje på ein trygg måte.
Han legg til:
– Viss det ikkje blir betre, vil me gje parkeringsgebyr.
Seksuallovbrot aukar
Totalt i Kvam, Samnanger og Tysnes politidistriktet var det 32 ungdomssaker i fjor, berre ei lita handfull av desse var her i kommunen.
– Generelt sett vil eg skryta av ungdommen vår, seier politistasjonssjefen.
Sperrevik og Tysseland fortel at talet på seksuallovbrot har auka blant ungdom, og at det spesielt er snakk om nedlasting av nakenbilete.
– Det er lurt å vera forsiktig med å leggja ut slike bilete, seier Sperrevik.
Det er ikkje berre blant ungdom talet på seksuallovbrot aukar. Blant vaksne var det fem saker i denne kategorien i Samnanger i 2024. Året før var det ingen.
– Me har hatt oppgang i heile Vest politidistrikt. Valdtekt og nedlasting av biletmateriale inngår i eit stort spekter av saker, seier Anne-Siri Tysseland.
Også her kan kunstig intelligens bli brukt.
– KI er mellom anna nytta til å laga seksualiserte bilete av born, fortel ho og legg til:
– Dette er tunge og tidkrevjande saker. Det er strenge beviskrav for i det heile å koma til retten. Me har hatt domfelling på fleire års straff i eininga.
– Dei økonomiske rammene er for små
Eitt av politiet sine hovudmål for 2025 er sterke, trygge lokalsamfunn. Gjennom politireforma i 2018 forsvann politikontoret i Samnanger, saman med mange andre stasjonar landet over.
– Målet er sjølvsagt at folk skal føla seg trygge. Men me må innretta oss etter det me får av økonomiske rammer. Forventningane er høgare enn me greier å innfri, seier Terje Sperrevik.
Han opplyser om at politiet ønskjer å vera tilgjengeleg, ha effektive tenester og yta god service.
– Dei økonomiske rammene våre er for små. Når me har færre ressursar, er det vanskeleg å nå måla.
– Det kan henda me legg bort for mange saker. Me har eit prioriteringsregime. Men politihjarta blør for dei sakene me ikkje får gjort noko med, seier Terje Sperrevik.
Politistasjonssjefen er uroleg for framtida og tida me lever i.
– Eg tenkjer på det større biletet, på den sikkerheitspolitiske situasjonen. På andre makter som vil inn og påverka oss. Me skal ikkje vera naive. Me er inne i ei utfordrande tid.
