Midt i mars var det klesbytedag i biblioteket, i regi av frivilligsentralen. I det store møterommet hang det fargerike kjolar og jakker på veggane, genserar og bukser var bretta sirleg og lagt utover borda.
– Det er veldig mykje fint her. Noko av det er heilt nytt, opplyser frivilligkoordinatoren.
Møteplass
Både i dagane før arrangementet og same føremiddag hadde folk vore innom for å levera brukte plagg som kunne bytast inn i «nye» på sjølve dagen. Arrangørane hadde sett ei grense på maks sju innleverte plagg per person, for å sikra at det som kom inn var i god stand og freistande å byta til seg. Det fungerte bra, fortel Anja Elisabeth.
Ho synest det er positivt med arrangement av denne typen.
– Det er kjekt at noko skjer, og biblioteket er ein fin møteplass.
Restar
Sjølv om mange var interesserte i å oppdatera garderoben på klesbytedagen, blei det noko til overs. Dette blir liggande i biblioteket ut veka, og alle som vil kan komma innom og henta seg klede gratis.
Fakta:
- Klesindustrien står for meir av verdas klimagassutslepp enn fly- og skipsfart til saman.
- 84% av utsleppa til eit plagg kjem frå sjølve produksjonen og frå transport til butikkane.
- Åtte av ti nordmenn meiner dei har for mykje klede og sko som dei ikkje brukar.
- Den store klesbytedagen blei starta i 2016 og er Naturvernforbundet sitt handlingsalternativ for å få ned klimautsleppa frå kleda våre.
- Frivillige over heile landet blir oppmoda om å arrangera klesbytedag der dei bur, slik at folk kan fornya garderoben utan å belasta miljøet.
Kjelde: Naturvernforbundet