Han har ikkje sans for Knut Harald Frøland (BL) sitt utspel om å løfta saka om motorsportsenter opp på eit regionalt nivå.
– Dette er å skyva frå seg sjansen til å skapa noko lokalt. For meg er det Samnanger som skal prioriterast. Me kan få eit regionalt senter her. Det støttar eg fullt ut. Men å etablera det ein annan stad, kjem eg ikkje til å arbeida for, seier ordføraren til Samningen.
– Utopi å finna nytt areal
– Kan det finnast areal her i kommunen som er betre eigna enn industriområdet i Rolvsvåg?
– Nei, det er eg rimeleg sikker på at det ikkje gjer. Me har mykje landskap som er prega av skog, myr og vatn. Og me har store areal som er sette av til landbruk, natur og friluftsliv (LNF). Men å tru at me kan få byggja motorsportbane og trafikktryggleikssenter på slike stader er utopi. Det vil aldri skje. I Rolvsvåg har me eit område som er regulert til næringsaktivitet. Og det er det me snakkar om her – næring, meiner Karl Kollbotn.
– Tragisk
Han peikar på at Rolvsvåg industriområde har eksistert i rundt 40 år. Likevel er det berre éi produksjonsbedrift der. Resten er lagerareal.
– No hadde me sjansen til å skapa noko meir, men fleirtalet i kommunestyret sa nei til å finna ut om det let seg gjera. Det er tragisk, seier Karl Kollbotn.