– Det er viktig å etablera byggjefelt med kort avstand til Bjørkheim, men folk bør vera merksame på at kommuneplanen også opnar for bustadbygging andre stader, seier Knut Harald Frøland (BL).
Mange alternativ
Han registrerer at mange som ønskjer å busetja seg i Samnanger, strevar med å finna hus eller tomt.
Å etablera nye, store bustadareal er ein krevjande prosess. Planarbeidet er omfattande, og ein må ha på plass avtalar og finansiering knytt til veg, vatn og avløp før ein går i gang.
– Då kan det vera mykje lettare å få frådelt ei tomt i eit område som allereie er bygd ut, påpeikar Knut Harald Frøland overfor Samningen.
Han viser til at kommunestyret har teke høgde for at folk skal kunna busetja seg i heile kommunen. I gjeldane arealplan er det opna for fortetting på følgjande stader: Rolvsvåg, Sagen, Lindane, Reistadliane aust, Reistadstølen, Brendahaugen, Storhaugen (vidareføring av gjeldande reguleringsplan), Lauskar, Lønnebakken, Gjerde/Steinsland, Haga, Indre-Tysse og Nordnes (vidareføring av gjeldande reguleringsplan).
VIL FORTETTA: Knut Harald Frøland i Bygdalista. FOTO: Arkiv
Sentrale strøk
I sentrale strøk kan ein fortetta med inntil tre bueiningar før krav om ny regulering slår inn. Som sentrale strøk vert rekna heile strekninga frå Ådland til Tysse.
– Eg vil oppfordra grunneigarar til å vurdera om dei kan skilja frå ei tomt eller fleire, slik at dei som ønskjer det kan få byggja og bu i Samnanger. I sum kan det kanskje her vera snakk om 20-30 nye einebustader, seier Knut Harald Frøland.
– Bruk kartet
Også einingsleiar for teknisk forvaltning i Samnanger, Jan Egil Leirstein, meiner fortetting er ein god måte å få opp bustadbygginga på.
– Eg har vel hatt to-tre slike saker etter at eg begynte i stillinga for om lag eitt år sidan, og alle har fått byggjeløyve. Det er relativt ukomplisert når ein kan gå rett på byggjesak, seier han.
Leirstein oppfordrar folk til å gå inn på kommuneplankartet og sjå kvar fortetting er mogeleg. I alt er det 13 slike stader i Samnanger.
Eigaren bestemmer
– Initiativet i slike saker må enten koma frå den som eig grunnen eller den som ønskjer å byggja. Men det er sjølvsagt grunneigaren som bestemmer om han aksepterer å få ein ny bustad på eigedomen sin, seier han.
– Er dette ei ordning som er godt nok kjent?
– Det veit eg ikkje. Det er opp til utbyggjarar og initiativtakarar sjølve å setja seg inn i kvar og korleis ein kan byggja i Samnanger, men at det er mogeleg å auka byggjeaktiviteten på denne måten, er heilt klart, svarar Jan Egil Leirstein.